比利時練兵試陣追半和|東方日報

另一場歐國聯A4組焦點戰，比利時主場硬撼威爾斯。「歐洲紅魔」一向唔重視歐國聯，箭頭盧卡古因傷冇入選，攻力受削；威爾斯王牌加里夫巴利喺美職hea住踢，狀態亦麻麻，加上近年碰頭經常半場未分高下，半場和不妨再追。
（周五凌晨2時45分開賽）

比利時雖然位居A4組次席，但佢哋只當歐國聯係練兵試陣場合，中場核心奇雲迪布尼今年6月就曾抱怨，話踢咗漫長球季後已身心疲倦，但因要出戰歐國聯而冇得提早放暑假，更炮轟呢項賽事一啲都唔重要，亦反映出眾將對歐國聯嘅態度。當然依家最後兩輪歐國聯，係作為世盃前最後檢閱，不過「歐洲紅魔」主力人選都定得八八九九，主帥馬天尼斯只會測試部分邊緣人，特別係射手盧卡古今次因傷落選，應該會試用轉戰土超嘅「車仔人球」巴舒亞伊，不宜高估。
威爾斯作客擺鐵桶陣

另一邊廂，威爾斯今屆歐國聯4戰未贏過，王牌加里夫巴利喺美職表現一般，一心hea住踢留力世盃，加上中場艾朗藍斯因傷冇入選，造訪「歐洲紅魔」惟有擺鐵桶陣死守。翻查紀錄，雙方近4次交手有3次開半場和，既然兩隊都陣容不整兼決心成疑，半場和更值博。