4強次回合步步為營 紅鑽櫻花細均力敵|東方日報

今日下晝同時間上演兩場日聯盃4強次回合，當中兩支盃賽專家浦和紅鑽及大阪櫻花再續前緣。首回合各一言和，今場相信都係步步為營，兩軍近8次交手全開2球或以下，再追2.5球入球細。（周日下午4時開賽）

簡單講吓賽制，日聯盃兩回合計打和，會計作客入球，未分勝負就會加時，但加時階段就唔計作客入球優惠，再和就互射12碼。

三箭歎慢板吼半場和
紅鑽係舊年日皇盃及今年日超盃盟主，櫻花就係2017年日聯盃冠軍，舊年亦殺入決賽，今季當然希望一嘗捧盃滋味。首回合踢成1比1，兩支對盃賽充滿經驗嘅球隊對碰，當然知道防守係最好策略，而且只差一步就殺入決賽，梗係穩陣為上。事實上兩軍熟晒路數，連同首回合，近8次交手全開2球或以下，今場入波都唔會多。

至於另一場廣島三箭返主場再鬥福岡黃鋒，首回合廣島三箭一度領先3比0下，作客先贏3比2，實力明顯比黃鋒強，而且佢哋近況亦好，預料可以保持領先優勢晉級決賽。三箭今季日職、日聯盃及日皇盃3線都有機會，既然首回合領先，呢場唔使急住進攻，可以留力及進行輪換，而且球隊近5次鬥黃鋒，4次開出半場和，今場可以再追。