意大利百歲防線靠唔住 匈牙利撻着再吼第一隊入球|東方日報

歐國聯A3組出線之戰，匈牙利主場迎戰意大利。相信事前冇人估到，牌面最弱嘅匈牙利現時力壓意、德、英3大強國排榜首，今仗對意大利只要保持不敗就可出線4強，戰意高昂，佢哋近3仗全部先入波，意軍防守亦唔見穩陣，匈牙利「第一隊入球」好路。(周二凌晨2時45分開賽)

匈牙利現以5戰3勝1和1負得10分排榜首，領先次席意大利2分，今仗唔輸就可出線，佢哋喺小組賽兩勝英格蘭，對德國1勝1和，作客意大利亦僅輸1比2，今仗再鬥意大利可謂目標明確，上仗「蠍子式入球」1比0擊敗德國嘅施沙拉爾，早前表明今個國際賽後將會退出國家隊，今場對意大利將會係佢告別賽，正是臨別秋波，今場先入波隨時就係佢。

施沙拉爾演告別戰必搏
意大利世盃出局後冇晒方向，而且人才凋零，3個後衞仲係35歲嘅邦路斯、34歲嘅法蘭斯高阿沙比同31歲嘅拉菲爾杜萊，呢條「百歲防線」好難唔失波，至於雙箭頭係23歲嘅施卡馬卡同22歲嘅拉斯柏度尼，略嫌經驗不足，中場佐真奴欠缺大心臟，喺關鍵時刻就會甩轆，否則意大利都唔會痛失世盃入場券，而且今場形勢上焗攻，更有利匈牙利打快速反擊，先入波更有把握。