挪威爭升班喪攻塞爾維亞|東方日報

歐國聯B4組升班關鍵戰，挪威主場迎戰塞爾維亞。挪威上仗作客斯洛文尼亞，領先下遭反勝1比2，另邊廂塞爾維亞4比1大勝瑞典，目前兩隊同得10分，挪威以較佳對賽成績排榜首，今仗和局亦可升班，不過塞爾維亞攻力強，挪威如果諗住守和隨時輸埋，最佳做法係力爭勝仗，佢哋近7仗5勝1和1負，近績對辦，主勝博得過。（周三凌晨2時45分開賽）

夏蘭特愈戰愈勇
挪威上仗雖然輸波，但「鋒霸」艾寧夏蘭特繼續有入球進帳，暫以6球高踞歐國聯射手榜首位，並成為近50年來首位喺頭22場國際賽入21球球員，睇走勢佢今場會繼續有士哥。夏蘭特一直希望挑戰頂級球隊，儘管無緣世盃，但依家有機會升上歐國聯A組，肯定全力搏殺。

塞爾維亞上仗大炒瑞典，射手阿歷山大米祖域連中三元，暫累積5球排射手榜次席，今仗同夏蘭特同場拗手瓜，再睇番首循環對賽，挪威作客1比0小勝對手，今仗挪威返主場出擊贏面更高，主勝值得睇好。