皇馬又遇薩克達大有睇頭|東方日報

歐聯F組第3輪好戲，皇家馬德里主場迎戰「老對手」薩克達。衞冕嘅皇馬喺F組實力超班，現時兩戰全勝暫列榜首，不過今仗又唔係贏硬，因為佢哋近年多次鬥薩克達互有勝負，睇番近6次交手有4次開4球或以上，不如轉玩3.5球入球大。（Now645周四凌晨3時直播）

皇馬主場巴拿貝球場趁住國際賽期間進行維修同重鋪草皮，法國射手賓施馬養傷近1個月終告復出，上場聯賽鬥奧沙辛拿雖然射失12碼，但經過熱身後今場會有更佳發揮。

近年對賽常演入球騷

基於歐聯抽籤檔次同歐洲足協部分規例問題，皇馬同薩克達近年經常喺分組賽碰頭，上屆、前屆同2015年都同組，前屆皇馬就曾遭薩克達「雙殺」，今場唔係話贏硬，好彩賓施馬對薩克達特別有計，呢6次對碰賓施馬4次正選上陣，當中3場取得士哥，預料入波唔成問題。

烏克蘭聯賽早前喺戰火下重開，薩克達回復正常比賽及操練，喺歐聯兩戰取得1勝1和，包括首輪作客大勝RB萊比錫4比1，佢哋上述6次對住皇馬，4次開4球或以上，加上皇馬近9場得兩場冇失波，3.5球入球大屬信心之選。