布魯日下盤明醒里|東方日報

歐聯B組第4輪重頭戲，馬德里體育會返主場再鬥布魯日。馬體會對上兩輪輸晒，為爭出線不容再失，但撞正連場報捷嘅「1哥」布魯日，焗攻下隨時得不償失，布魯日仲有得受讓1/1.5球咁筍，下盤咪走寶。（Now644周四凌晨零時45分直播）

馬體會入球能力差勁
馬體會今屆歐聯表現差勁，首輪靠補時兩度建功，幸運地以2比1擊敗波圖，近兩輪面對利華古遜及布魯日均淨吞兩蛋，依家同波圖及利華同得3分，落後榜首布魯日6分，想出線必須全力爭勝。不過馬體會攻力不濟，今屆僅入兩粒咁大把，不宜高估。

另一邊廂，布魯日喺少帥賀夫根斯帶領下，各項賽事近11仗取得9勝2負，雖然上仗聯賽對韋斯達路輸波，明顯有留力成分，單計歐聯佢哋豪取3連勝，成為首支喺歐聯頭3輪贏晒嘅比利時球隊。今季由巴塞來投嘅前鋒祖格拿，已攻入2球及交出2次助攻，而由前利物浦門神米洛列特鎮守防線，呢3戰更保持清白之身，加上馬體會不擅搶攻，過於壓前令防線暴露更多空位，更加有利布魯日打快速反擊，今仗隨時贏波提早篤定晉級資格，下盤值得捧場。