車仔重返正軌踩油搶Ｗ|東方日報

英超「倫敦打吡」賓福特主場迎戰車路士，賓福特季初曾有唔錯表現，但及後無以為繼，近期更頻頻大敗，士氣大受打擊。車路士改由樸達執教後，表現重回正軌，上仗再擊敗維拉後，近5場比賽全勝。睇番近5次對賽車路士贏咗當中4次，預料今仗作客都可以全取3分，直取客勝。（Now623周四凌晨2時30分直播）

樸達接手更具侵略性
賓福特季初曾大炒曼聯4蛋，令球迷刮目相看，但其實好大程度因為「紅魔鬼」當時狀態太差，不宜作準。佢哋今季踢咗10場聯賽只係贏得3場，而且往往遇強即屈，包括0比3輸畀阿仙奴，以及1比5大敗於紐卡素腳下，上仗雖然以2比0擊敗白禮頓止止血，但其中一球來自12碼，表現唔見突出，遇上來勢洶洶嘅車路士，恐怕難以招架。

車路士整體實力明顯喺賓福特之上，加上經過主帥樸達改造後，踢法更具侵略性，特別係中場美臣蒙特「被激活」，上仗英超作客阿士東維拉個人梅開二度，呢位英格蘭國腳近3場比賽，交出2球及3助攻，配合奧巴美揚、史達寧及夏維斯等進攻好手，車仔可望反客為主，客勝屬穩陣之選。