拿玻里打羅搶分捧上盤|東方日報

今晚意甲重頭戲，羅馬主場迎戰拿玻里。雖然羅馬取得聯賽3連勝，但其中兩場對手只係弱隊萊切、森多利亞，「水分」甚重，不宜高估。反觀「一哥」拿玻里戰績貨真價實，各項賽事取得10連勝，表現銳不可當，今仗有力再下一城，拿玻里讓平半，直取上盤。（Now638周一凌晨2時45分直播）

戴巴拿受傷削羅馬攻力
羅馬早前曾經擊敗國際米蘭，氣勢一時無兩，但只要細心留意，就會發現呢支首都球隊表現只屬一般。當時贏到國米，好大程度上由於對手狀態低迷。睇番羅馬近兩場聯賽對萊切、森多利亞，佔唔到明顯優勢，兩場都要靠球員博到12碼，先至贏波攞3分。特別係上仗對包尾嘅森多利亞，兩位前鋒譚美阿巴謙、比洛迪表現一無是處，可見射手保羅戴巴拿養傷，對於羅馬進攻影響非常大，今場遇上榜首拿玻里，預料會處於劣勢。

另一邊廂，拿玻里表現勢如破竹，歐聯分組賽4戰全勝已經提早出線，可以集中火力踢聯賽，相信表現會更佳。拿玻里最犀利係攻力強勁，近3場聯賽合共轟入10球，拉斯柏度尼、域陀奧森漢、夏榮羅辛奴、基奧雲尼施蒙尼、基華拉斯基利亞等中前場球員輪流數胡，攻擊點多元化，令對手防不勝防，今仗可反客為主，全取3分而回。