主場出擊遇強愈強 華歷簡奴蓄細搶分|東方日報

今輪西甲壓軸之戰，華歷簡奴主場對皇家馬德里，論牌面無疑係皇馬秤先，但華歷簡奴近期表現亦唔失禮，已經連續保持4場聯賽不敗，包括作客打和馬德里體育會，踢法非常硬淨。臨近世盃，皇馬眾星可能會比較錫身，避免受傷下未必搏盡。加上兩隊近4次交鋒有3次總入球開2球或以下，寧願揀中位數2.5球嘅入球細。（Now632、611周二凌晨4時直播）

華歷簡奴今季遇強愈強，首周賽事就爆冷打和巴塞隆拿0比0，上月作客逼和馬體會1比1，上仗以1比0擊敗另一支歐聯分子西維爾，絕對唔嘢小。事實上，華歷簡奴自知人腳質素有限，專注踢簡單直接嘅穩守突擊，往往令對手老鼠拉龜，無從入手，加上有之前打和巴塞隆拿同馬體會嘅經驗，相信今仗對住皇馬，將會重施故技。

世盃近眾國腳或有保留
至於皇馬上仗歐聯大勝些路迪5比1，好大程度上因為對手賽前已篤定出局，無心戀戰之下，先至任由「銀河艦隊」宰割，踢聯賽唔可以一概而論，特別係皇馬上輪西甲主場被弱隊基羅納逼和1比1，今仗作客唔一定贏梗。

同埋皇馬陣中多國腳級球星，佢哋即將參加世盃，自然唔想受傷搞到冇份入選國家隊，例如賓施馬今季經常受傷，更加會就住踢，其他隊友相信都有同樣顧忌。因此就算皇馬贏波，亦可能只會小勝，博入球細更划算。