國米急先鋒搶半W|東方日報

今晚意甲焦點戰，國際米蘭主場硬撼博洛尼亞。國米上輪國家打吡失威，今仗力求反彈，而且主場出擊例搶韁，遇上客場腳軟嘅博洛尼亞，勢必先發制人，半場主勝有計。（Now638周四凌晨3時45分直播）

國際米蘭確實有回勇迹象，喺盧卡古、波索域等主力因傷缺陣下，於歐聯死亡C組成功出線，上輪聯賽兼國家打吡作客雖然淨吞祖雲達斯兩蛋，不過「藍黑兵團」每逢主場均先發制人，連同盃賽在內，近4仗主場全勝之餘，全部都喺上半場取得領先優勢，上輪國家打吡輸波失威，更加激起眾將爭勝決心，今場一開波就嚟料。

博洛尼亞作客腳軟
另邊廂，博洛尼亞儘管連盃賽豪取4連勝，不過要留意其中3仗係來自主場，該隊客場經常腳仔軟，各項賽事近6仗作客，只得1勝1和4負，主客表現反差極大，加上博洛近3次造訪國米，均喺上半場已經落後，今仗隨時半場都頂唔住。