基爾求穩入球細攞威|東方日報

周六凌晨德乙直播戲碼，基爾主場迎戰「4哥」漢諾威。漢諾威最近能夠止跌回升，全靠防守回穩，造訪遇強即屈嘅基爾會先求穩陣，2.5球入球細有分頭值博。

（on.cc東網周六凌晨1時30分直播）
雖然中游分子基爾只係落後漢諾威3分，但狀態只係一般，近4仗聯賽僅得1勝2和1負，而且近期喺主場面對勁旅漢堡及杜塞爾多夫均輸波，可見佢哋對住強隊都腳仔軟，今仗就算有地利亦靠唔住。

漢諾威靠防守搶分
另一邊廂，漢諾威走出早前連敗困局，近5仗聯賽獲3勝1和1負，唯一敗仗只係輸畀榜首達斯泰特，佢哋啱啱喺周中快車又贈杜塞爾多夫兩蛋，防守穩陣係關鍵因素。連同盃賽在內，漢諾威近6仗只係失咗3粒咁大把，其中2球係德盃畀德甲勁旅多蒙特攻入，而呢6仗全開2球或以下，其中4仗更保持清白之身，防線固若金湯。翻查紀錄，雙方近4次碰頭，各得2勝2負，因此漢諾威不能大意，隨住「2哥」漢堡於周中快車輸波，佢哋依家只落後漢堡4分，有力爭前2名直接升班席位，既然近期咁守得，今仗作客必定穩陣行先，2.5球入球細有逾2倍，不容錯過。