突尼西亞上盤穩陣|東方日報

鬥亞洲兵特別醒神

今晚世盃D組次輪頭場，突尼西亞硬撼澳洲。「迦太基之鷹」首輪賽和丹麥，表現唔算差，而且近年專剋亞洲球隊，撞正實力最曳嘅澳洲，絕對係開齋好時機，小讓平半上盤有計。

（Now618及616周六晚上6時直播）

雖然5支非洲球隊喺今屆世盃戰績差勁，首輪冇一隊贏波，突尼西亞喺D組首仗亦與丹麥互交白卷，整場控球率略處下風，不過丹麥嘅進攻隔靴搔癢，反而突尼西亞一次中龍埋門幾乎得手，可惜箭頭伊斯森積巴利挑射畀丹麥門神卡斯柏舒米高及時封出，表現絕不失禮。查實「迦太基之鷹」對住亞洲球隊特別醒神，之前3次面對亞洲兵贏晒，包括今年6月麒麟盃決賽大勝東道主日本3比0，唔講得笑。

澳洲近7世盃6敗

澳洲近年實力每況愈下，今屆只靠附加賽先殺入決賽周，主帥艾萊特深明青黃不接問題，特登召入尼達利艾堅遜、拉利麥基爾、哈利修達、加蘭古奧等較年輕球員，希望為未來鋪路，不過佢哋經驗不足，而老將阿倫穆爾、貝軒治、米歇爾杜基等老將質素所限，亦有心無力，首輪對住上屆盟主法國，早早領先兼對手有盧卡斯靴南迪斯傷出嘅情況下，竟然反輸1比4，毫無還手之力。加上「袋鼠國」近7場世盃僅得1和6負，明顯出唔到大場面，受讓都信唔過，寧捧突尼西亞上盤。