日本足球小將冀創奇蹟|澳門日報

日本足球小將冀創奇蹟

日本在今屆世界盃踢出熱血足球，以首名晉級十六強。世上唔少球員都話睇日本漫畫《足球小將》長大，日本這班足球小將唔只踢出漫畫中的劇情，陣中亦有一對同門師兄弟三笘薰及田中碧，兩人的成長故事亦同漫畫一樣咁熱血。

日本上仗在出線生死戰，三笘薰在備受爭議的底線零角度傳中，助攻田中碧射入反勝一球，情節就像漫畫劇情般。兩人唔只係隊友，原來亦是同門師兄弟，同就讀神奈川縣川崎市鷺沼小學，兩人年紀只相差一年，且由細已立志“要代表日本踢世界盃！”，當年更被同學取笑。兩人成長軌跡非常近似，不但讀同一間小學，隨後更齊加入川崎前鋒U12青年軍，一齊在U15、U18成長，並在川崎前鋒出道，同樣在二一年轉戰歐洲。兩人的成長就像《足球小將》主角大空翼及岬太郎一樣，並一齊為日本出戰世界盃。

三笘薰：爭取入球

三笘薰已成為日本教練森保一的秘密武器，兩人上仗齊齊做英雄，希望在十六強再合作，協助球隊打破宿命首次晉級八強。三笘薰直言希望今場唔只助攻，希望能有“士哥”：“我的入球能力需要加強。若為了球隊勝利需要做些甚麼，就是入球，我們的目標是首次躋身八強。”師弟田中碧亦希望再踢好波：“三笘薰對我來說就像哥哥一樣，亦是我追趕的目標。”

長友：要無畏無懼

日本老將長友佑都鼓勵隊友要踢得更勇敢：“戰術是很重要，但有時在場上若踢得畏首畏尾，戰術再好都是冇用。我們要鼓起勇氣，將戰術發揮至最大化。”