ＱＰＲ立立亂般尼上盤抵玩|東方日報

今晚英冠有場前列對決，昆士柏流浪（QPR）主場硬撼榜首般尼。QPR主帥米高比爾被撬走，隊內軍心大亂，般尼仲唔趁你病攞你命咩，客隊小讓平半必捧上盤。

■（有線661及601台周日晚9時直播）

主帥米高比爾被格流撬走

喺10月一度頻頻報捷嘅QPR，臨世盃開打前突然跌Watt，近5場聯賽錄得1和4負，當中4場入唔到波，明顯出現信心危機。本來QPR想趁世盃期間進行調整，點知呢段空檔期蘇超格拉斯哥流浪怒炒教頭雲邦賀斯，並將QPR主帥米高比爾撬走，搞到QPR立立亂，球隊總監兼名宿費迪南嬲到震，依家仲搵緊人接手，暫時由保羅賀爾擔任看守領隊，唔多靠得住。

雖然般尼主帥高柏尼都有傳將接手比利時國家隊，但吹水成分居多，前鋒薩洛利現正為摩洛哥出戰世盃，好在仲有箭頭艾殊利班尼斯及積洛迪古斯等人撐住。事實上般尼擺脫季初攻力不足嘅問題，目前聯賽已攻入40球，火力冠絕英冠，難怪喺世盃前7場聯賽，豪取6勝1負佳績，造訪軍心不穩嘅QPR，有力反客為主。