紐卡素撻着上盤獵狐|東方日報

至於「3哥」紐卡素作客「狐狸」李斯特城，紐卡素不但近8仗聯賽贏7仗，啱啱英聯盃又晉級，士氣大振，必定食住個勢捉「狐狸」，寧買當頭起，紐卡素讓平半，上盤有計。（ViuTV96、Now621周一晚11時直播）

「喜鵲」勢強李斯特城難招架

李斯特城參加世盃嘅球員好多分組賽已出局，而中場占士麥迪臣更未獲英格蘭重用，耗力唔多。該隊喺休戰期間赴中東集訓，保持狀態，並喺上周中英聯盃16強輕取米爾頓凱恩斯3粒，泰利文斯同占美華迪都有士哥，不過對手只係英甲仔，贏波唔代表乜嘢。

另邊廂，「喜鵲」紐卡素喺休戰期間去咗中東集訓，之前亦同希拉爾及華歷簡奴「拍跳」都贏波，雖然陣中有尼克普比、般奴古馬雷斯、法比安舒哈、哥林威爾遜及捷比亞等要參加世盃，不過大部分都只屬後備，因此喺上周中英聯盃16強對住同樣來自英超嘅般尼茅夫，佢哋都立即披甲，更憑對手擺烏龍小勝1比0，有助提升狀態。查實紐卡素喺世盃前8仗聯賽，豪取7勝1和未輸過佳績，依家做緊聯賽「3哥」，連同英聯盃又贏波晉級，氣勢如虹，今仗有力乘勝追擊。