紅軍作客拆大禮|東方日報

沙拿抖夠爭取入波

「拆禮物日」另一英超焦點戰，阿士東維拉主場硬撼利物浦。維拉易帥後進攻明顯有起色，不過門將達米安馬天尼斯唔會披甲，防線欠穩，紅軍王牌穆罕默德沙拿等主力養精蓄銳堅餓波，今仗隨時鬥攻，2.5球入球大咪錯過。（Now621周二凌晨1時30分直播）

維拉之前怒炒謝拉特，搵嚟教過阿仙奴嘅艾美利接手，佢崇尚進攻，喺11月接手後3仗正式賽事獲2勝1負共入7球，早前啞火嘅丹尼艾格斯同奧尼屈堅斯都重拾射門鞋，不過3仗都有失波。而維拉喺世盃期間踢咗4仗熱身賽，僅獲1勝之餘，其中3仗未能保持清白之身，首席門將達米安馬天尼斯啱啱幫阿根廷勇奪世盃，今仗唔會把關，對於原本已不穩嘅防線更存隱憂。查實維拉近5仗聯賽全開3球或以上，入得又失得。

阿士東維拉防守不穩狂失波

利物浦有佐敦軒達臣、艾利臣比加、法賓奴泰華利斯等出戰世盃嘅國腳已經歸隊，最重要係王牌穆罕默德沙拿、堤亞高艾簡達拿冇份參加世盃，抖到夠等聯賽重開。紅軍早前熱身賽對里昂及AC米蘭獲1勝1負，而喺上周中英聯盃16強以2比3不敵曼城，衞冕失敗，防守亦多甩漏，不過沙拿都有波入，為咗殺上前4，今仗必定以攻代守。加上近5次交手亦有4次開3球或以上，2.5球入球大穩開。