沙蘭力坦拿下盤A級之選|東方日報

今晚意甲打頭陣有沙蘭力坦拿主場對「2哥」AC米蘭。AC箭頭基奧特雖然已經歸隊，但陣中傷兵滿營，造訪主場特醒嘅沙蘭力坦拿，隨時失分而回，仲要讓1/1.5球咁多，捧下盤好過。（Now638周三晚7時30分直播）

AC米蘭傷兵一籮

AC箭頭基奧特雖然於世盃踢到決賽，但佢近日已歸隊復操，今仗有機會披甲。不過「紅黑兵團」陣中依然傷兵一大籮，首席門神邁治蘭本來已因傷錯過世盃，預計聯賽重開可以復出，點知近日經隊醫評估傷勢後，決定將復出日期推遲至2月，仲有卡積亞、祖利亞美斯亞斯、列比錫同奧歷治都有傷在身唔出得。睇埋佢哋之前同阿仙奴、利物浦同里昂「拍跳」，法定時間全部輸晒，真係睇見都唔開胃。

中游分子沙蘭力坦拿今季15仗聯賽只得4勝，不過其中3仗於主場取得，單計近6仗聯賽主場，就取得3勝2和僅1敗，主場有一定反抗能力。「墨西哥Sam哥」奧祖亞剛啱冬窗加盟，今仗或首度上陣，若有呢位鋼門鎮守大關，隨時令AC老鼠拉龜冇碇埋手，沙蘭力坦拿主場仲受讓1/1.5球咁筍，一於捧下盤。