阿士東維拉屠狼搶W|東方日報

除咗倫敦打吡，今日仲有另一場西米德蘭茲打吡，阿士東維拉主場鬥狼隊。兩支季中同樣換咗名帥，維拉11月由艾美利上任後，4場聯賽獲3勝1負，至於狼隊盧比迪古世盃後先正式執教，仲要時間執吓隊波，今場擁有主場之利嘅維拉可以睇高一線。（Now622周四凌晨4時直播）

兩名西班牙領隊張履歷表都唔簡單，艾美利淨係喺西維爾成「歐霸之王」已經夠晒照，佢仲教過PSG、阿仙奴同維拉利爾，執教功力不容懷疑，今次重返英超已經攞到好成績，領軍4場英超，分別擊敗曼聯、白禮頓同熱刺，僅輸畀利物浦。

狼隊積弱人腳未齊

盧比迪古同樣帶過西維爾攞到歐霸，佢之前教過西班牙國家隊同皇馬，不過成績只係麻麻。嚟到狼隊預計可以為球隊帶新景象，不過球隊積弱太耐，相信仍然要等冬季轉會窗後，佢哋搵到適合人選先會有顯著改善，到時捧場都未遲，今場都係玩番主W好啲。