意盃16強開打 國米帕爾馬大駁火|東方日報

意大利盃16強，上屆冠軍國際米蘭主場對乙組仔帕爾馬，兩隊實力有明顯距離，預料國米會輪換陣容，但一眾副選為爭上位，踢法應該會更進取主攻。至於帕爾馬近3仗作客合共攻入5球，證明攻力不俗，就算今場輸波，都應該有力破蛋。加上國米近4次正式賽事，3次總入球開出4球或以上，不妨再追中位數3.5球嘅入球大。（有線662及602台周三凌晨4時直播）

意甲重開之後，國際米蘭立即發威，擊敗榜首拿玻里，但上仗對弱隊蒙沙，反而被逼和2比2，包括踢到補時失第2球，可見「藍黑兵團」防線唔多穩陣，今仗未必能夠保持清白之身。不過，國米鋒線屬於意大利球壇數一數二，3位著名射手盧卡古、迪斯高、拿達路馬天尼斯輪流上陣，以佢哋嘅級數，無論邊兩個擔任正選，攻力都有保證，要攻入帕爾馬大門，並唔困難。
法蘭高華斯基斯腳風順

至於帕爾馬兩年前降落意乙，今季排前列位置，有力爭奪升班資格，目前士氣唔錯，前鋒法蘭高華斯基斯上仗聯賽梅開二度，協助球隊打和威尼斯2比2。呢位33歲阿根廷射手曾經效力西維爾5季，具備一定級數，有力對國米防線構成威脅。國米主W冇肉食，捧入球大更划算。