拿玻里惡氣足搶主Ｗ|東方日報

今晚意甲爆發大戰，拿玻里主場惡鬥羅馬。拿玻里上半季豪取50分，相隔33年再稱霸意甲目標鮮明；羅馬近況都勇，但尼高路辛尼奧路鬧離隊罷賽，加上傷停影響未能「夫添」出擊，睇番拿玻里近7仗聯賽主場全勝，惡氣十足，主Ｗ值得睇高一線。（Now639周一凌晨3時45分直播）

拿玻里今季大換班，幾位主力法比安彭拿、高列巴尼及恩斯治尼離隊，點知重組後成績大爆發，首席射手域陀奧森漢攻入14粒，左翼基華拉斯基利亞交出9入球及12個助攻，兩人包辦球隊一半以上入球，後防有南韓「五金防線」骨幹金玟哉睇住，聯賽19仗僅失14球，係意甲防守最好一隊，可謂攻守兼備。拿玻里目前已領先次席ＡＣ米蘭12分，今晚只要贏埋羅馬，形勢將會更好。

新托迪扭計羅馬難出強陣
羅馬現時排第4，落後拿玻里13分，佢哋世盃後5仗4勝1和不敗，不過近日受「新托迪」尼高路辛尼奧路離隊罷賽風波影響，加上薛基施歷停賽，韋拿杜姆仲未復出，未能以最強陣容出擊，相當蝕底，輸波不足為奇。