貝迪斯巴塞鬥踢守細波|東方日報

西甲前列大戰，貝迪斯主場對巴塞隆拿，雙方喺早前西超盃4強交鋒，激戰120分鐘仍然打和，需以互射12碼分勝負，可見兩隊實力旗鼓相當。加上巴塞近期踢法傾向穩陣，已經連續3場聯賽小勝1比0，預料今仗作客唔會冒進。翻查巴塞近4場聯賽總入球全開2球或以下，一於再追中位數2.5球嘅入球細。（Now632及611周四凌晨4時直播）

貝迪斯過去兩季聯賽分別排第5及6位，今季亦保持穩定發揮，同維拉利爾同分並列第5位，目標力爭打入前4位，奪取下屆歐聯入場券。貝迪斯強項係防守非常穩陣，今季踢18場聯賽僅失14球，屬於失波第2少嘅球隊之一，僅次於巴塞隆拿，所以兩隊早前西超盃碰頭，鬥得難分難解。雖然貝迪斯防守強，但攻力欠佳，上仗對護級分子基達菲，都要踢到86分鐘先至靠博到12碼，險勝1比0，恐怕今仗無力攻入巴塞大門。

迪比利養傷攻力受損
至於榜首巴塞隆拿一改傳統水銀瀉地主攻踢法，近期以穩陣行先，連續3場聯賽贏1比0，加埋打和愛斯賓奴1比1，近4場西甲總入球全開2球或以下。此外，巴塞隆拿仲收到一個不利消息，翼鋒奧士文尼迪比利上仗西甲對基羅納，踢到26分鐘就傷出，估計需要抖2至3星期，呢位法國國腳今季西甲入5球及5次助攻，佢缺陣之下，巴塞攻力勢必受削，入波唔會多。