畢爾包主場細鍊卡迪斯|東方日報

周六凌晨西甲賽事，畢爾包主場迎戰護級分子卡迪斯。畢爾包經歷聯賽3連敗之後，爭奪來季歐洲賽資格大受打擊，今仗為「止血」會先求穩陣，面對鋒力疲弱嘅卡迪斯，好大機會係悶戰一場，捧中位數2.5球入球細啱數。

（Now632周六凌晨4時直播）
畢爾包近況麻麻，對上5場聯賽未贏過，近3仗更加全部輸晒，不過畢爾包主場出擊有一定保證，尤其防守非常穩健，近5仗主場正式賽事有4次保持不失球。相信今場以「止血」為先，將會用最擅長嘅防守踢法迎敵，佢哋近5場聯賽就有4次總入球開2球或以下。

近5場聯賽4次開細
作客嘅卡迪斯入球能力不足，今季19場聯賽只係入得14球，入球數字係全西甲第2少，作客更加冇本錢主攻，今仗入波唔會多，中位數2.5球入球細係最佳選擇。