一肚氣遇私房菜皇蘇客Ｗ起筷|東方日報

今晚西甲有場獨腳戲，愛斯賓奴主場硬撼3哥皇家蘇斯達。愛斯賓奴雖要為護級搶分，但主場戰績不濟，有地利都難睇好；皇蘇上輪輸波一肚氣，誓要搵「私房菜」發洩，一於捧客勝。（周二凌晨4時開賽）

愛斯賓奴主場冇威力
位處下游嘅愛斯賓奴，復賽後略有起色，近6場聯賽取得2勝3和1負，包括作客打和同市宿敵兼榜首巴塞隆拿。不過佢哋主場就失威啲，今季10仗主場聯賽，只得2勝4和4負，主場成績排尾3，而且僅入12粒，攻力疲弱，上仗喺地頭打和奧沙辛拿1比1之役，更有後衞皮爾加比爾被逐，今晚要坐波監，可謂雪上加霜。

另一邊廂，皇蘇今季異軍突起殺入前3，雖然上輪爆冷輸畀弱旅華拉度列，令7仗聯賽不敗走勢告終，但查實全場撳住對手嚟攻，贏形勢輸波堅唔夠運，就算老將大衞施華有傷未必出得，但「日本美斯」久保建英已憑表現站穩正選，射手阿歷山大索洛夫近7仗聯賽入5粒，今晚又有機會數胡。翻查紀錄，兩軍近6次交鋒，皇蘇取得5勝1負，擺明恰慣愛斯賓奴，今仗遇上「私房菜」，必定趁熱起筷，一吐上仗輸波烏氣，客Ｗ不容錯過。