曼城未回氣半場捱細界|東方日報

另一場英超搶分戰，般尼茅夫主場迎戰曼城。般茅深受降班威脅，一定要搏命搶分，佢哋近兩場搶得4分，對住曼城會更硬淨，盡量避免失波，曼城近期連和兩場，氣勢回落，而且表現慢熱，近8仗聯賽作客，半場7次開1球或以下，追1.5球半場細穩陣。

（Now621周日凌晨1時30分直播）
曼城上輪聯賽對森林失分後返回次席，落後阿仙奴2分並多踢1場，之後轉戰歐聯16強首回合對RB萊比錫又打和，兩場都係半場領先後被追平，踢成1比1，最特別係歐聯一仗，哥迪奧拿0換人，所有主力踢足90分鐘，依家返到聯賽再搏殺，艾寧夏蘭特、馬列斯、根度簡、基亞利殊等戰將體力輸蝕，奇雲迪布尼同拿樸迪亦因身體不適上陣成疑，未必能夠夫添出擊，加上今場係佢哋近期連續第4場作客比賽，相信上半場會踢穩陣波。

般茅傷兵回歸頂得住
英超榜下游形勢緊湊，比爭標更刺激，般茅僅比排尾3嘅韋斯咸多1分，依家各隊為搶分護級出盡法寶，般茅踢法體力化，對住賽程頻密嘅曼城可能搵到着數，而且佢哋多名傷兵包括史坦尼斯拿斯、謝法臣拿馬等陸續歸隊，陣容愈變愈強，絕對有條件喺藍月身上搶分，只要守住半場就搶分在望，1.5球半場細值博。