倫敦打吡熱刺細盤好路|東方日報

英聯盃決賽之前，先睇一場英超倫敦打吡，熱刺主場火併車路士。熱刺雖然上仗擊敗韋斯咸，但仍然傷兵滿營，「車仔」連續5場不勝，各項賽事近6仗只入2球，全開2球或以下，攻力咁差，捧2.5球入球細好路。（Now621及611周日晚9時30分直播）

車路士進攻雜亂無章
熱刺傷兵問題嚴重，主帥干地手術後仍在休養，近期由助教斯特里尼帶隊，門將洛里斯及翼鋒賴恩施斯隆預計抖到4月，中場賓坦古亞提早收咧，比蘇馬同樣復出無期。就算好番都未必有用，好似巴西中鋒李察利臣，上仗對韋斯咸都係冇料到，嚴重影響球隊戰力。

車仔嘅問題更複雜，冬窗瘋狂買人後以為有新景象，點知球隊成績未見改善，上仗0比1輸畀修咸頓後，全隊壓力愈來愈大，球員受壓下又冇腳好波，形成惡性循環。安素費南迪斯、梅迪歷等新兵仍未融入，進攻雜亂無章，隊長艾斯派古達上仗末段被踢中頭部一度昏迷，因曾腦震盪按賽例冇得披甲，由於熱刺反擊力強，令佢哋更加唔敢輕舉妄動，收窄防線踢悶波之下，預計會係一場少入球賽事。