錫菲聯硬淨半和抗刺客|東方日報

今晚英足盃16強，英冠錫菲聯主場越級挑戰熱刺。熱刺仲有唔少傷兵，加上佢哋近年喺英足盃對非英超球隊，經常半場未分勝負，半場和有計。（周四凌晨3時55分開賽）

熱刺多線作戰就住踢
錫菲聯目前穩居英冠前列，奧利華麥貝尼、辛達貝治及伊利文尼戴耶等一眾主力經驗豐富，而且佢哋主場有保證，近8仗主場獲7勝1負，當中近4仗3次半場打和，夠晒硬淨。

熱刺飽受傷患困擾，除賓坦古亞提早收咧外，隊長洛里斯、比蘇馬及賴恩施斯隆等續抖，影響唔細，焗用久疏戰陣嘅費沙科士打把關，始終唔多放心，近期亦刻意加強防守，連續兩仗贏韋斯咸同車路士，都保持清白之身。何況熱刺仲要兼顧聯賽同歐聯，下周中歐聯16強次回合再鬥ＡＣ米蘭尤其緊要，以目前咁單薄嘅兵源，難免要就住嚟踢。翻查紀錄，熱刺近3次英足盃對非英超球隊，全開半場和，包括今屆上兩圈對樸茨茅夫及普雷斯頓，半場均互交白卷，不妨追多鋪。