追分入前4 作客照搶 祖記弗爆反轉羅馬|東方日報

今晚意甲爆發「強強對決」，羅馬主場硬撼祖雲達斯。羅馬上仗輸畀魚腩克雷莫納，仲有教頭摩連奴被逐，呢位葡萄牙名帥今仗要停賽，勢必影響臨場戰術調動。祖記正全力搶分爭重返前4，鬥志一流，佢哋各項賽事近7仗取得6勝1和，勢必乘勝追擊，祖記平手盤抵玩到極。（Now639周一凌晨3時45分直播）

羅馬近期狀態明顯走下坡，即使對弱隊都佔唔到甜頭，包括僅打和萊切1比1，小勝維羅納1比0，最離譜係上仗對住當時排包尾兼未嘗一勝嘅克雷莫納，諗住3分走唔甩，點知球員表現水準以下，最終倒灶輸1比2。

摩連奴停賽影響臨場調動
羅馬輸波不突止，教頭摩連奴更因為同第4旁證爭吵被逐，搞到今仗要停賽，賽後佢亦承認球隊表現曳，包括行軍速度慢，組織攻勢能力弱。羅馬對住護級球隊都陷入苦戰，遇上來勢洶洶嘅祖雲達斯，恐怕情況更加惡劣。

祖記因為財務違規被扣15分，本來諗住今季玩完，可幸一班球員愈戰愈勇，早前大炒南特3比0殺入歐霸盃16強，上仗意甲「都靈打吡」以4比2反勝拖連奴，聯賽豪取4連勝，合共轟入10粒，令打入前4重燃希望，加上迪馬利亞、費達歷高基艾沙及杜辛華荷域等中前場球員狀態相當好，作客都有本錢主攻搶分。睇番雙方近4次對賽，祖雲達斯取得3勝1和，平手盤值得追捧。