卡尼孤掌難鳴 熱刺頹細咬唔入A米|東方日報

同晚另一場歐聯16強次回合生死戰，英超勁旅熱刺主場出擊迎戰AC米蘭，力圖收復首回合輸0比1嘅失地，不過熱刺近況相當低迷，對上兩仗都吞蛋輸波，喺前線死火同傷兵滿營情況下，要攻陷防守硬淨嘅「A米」極有難度，博2.5球入球細好路。（Now644周四凌晨4時直播）

進攻創造力低係熱刺長期死穴，進攻靠晒哈利卡尼單天保至尊，喺孫興民、李察利臣等前鋒狀態長期低迷下，球隊成績隨即直線下滑，近6場比賽4次輸波，其中3場交白卷，加上賓坦古亞、比蘇馬同洛里斯等主力受傷，中堅艾歷迪亞又要停賽，戰鬥力令人擔心。儘管意大利領隊干地傷愈回歸領軍，對熱刺嘅刺激都有限。

「紅黑兵團」近5仗只失1球
AC米蘭今場只要保持不敗就可以晉級，作客會大安旨意先求穩守，「紅黑兵團」近5場比賽只失1球，加上首席門神邁治蘭傷愈復出把關，防守力值得信賴。睇番兩隊過去交手成績，AC米蘭對上3次同熱刺喺歐聯交鋒，總入球全開2球或以下，今仗再開入球細機會高。