搶分鬥攻冇保留 曼聯開火大盤修錢|東方日報

英超上演「魔聖之戰」，曼聯主場對修咸頓，「紅魔鬼」曼聯喺早前「雙紅會」慘吞利物浦7蛋後，上仗歐霸盃立即大勝反彈，證明球隊狀態仍佳，預料今仗會繼續強攻對手。「聖人」修咸頓有「新帥效應」光環支持，為搶分護級，勢必豁出去一搏。考慮到曼聯近6仗聯賽主場總入球全開3球或以上，一於再追中位數2.5球嘅入球大。（Now622周日晚10時直播）

曼聯由上年年底開始「魔性澎湃」頻頻贏波，重返英超爭標行列，早前作客0比7大敗於利物浦腳下，只屬「個別事件」，唔代表狀態走下坡。加上領隊坦哈格一向軍紀嚴明，球員畀佢「照肺」之後，不敢怠慢，上仗歐霸盃16強首回合主場以4比1大勝西甲前列分子貝迪斯，4位進攻球員安東尼馬菲奧斯、般奴費南迪斯、拉舒福特及韋格賀斯各入1球，證明佢哋有真誠反省，一齊發力重振聲威。

防線不穩入波搭夠
以曼聯近11場聯賽主場獲得9勝2和嘅凌厲走勢，相信會擺大個頭主攻，力爭再下一城。不過，「紅魔鬼」防線唔算穩陣，近4場聯賽主場失4球，今仗搶攻嘅同時，未必可以保持清白之身。
修咸頓深陷降班漩渦，早前經歷今季第2度換帥後，開始上力，新帥魯賓施利斯領軍下近3仗聯賽取得2勝，包括作客擊敗車路士，唔好低估「聖人」反擊力。事實上，修咸頓身處降班區，已經冇嘢好輸，與其坐以待斃，不如豁出去搶攻，隨時有驚喜收穫，特別係中場禾特普斯係「罰球專家」，有機會射破「紅魔鬼」大門，捧入球大最划算。