衝「小3冠」唔會留手 曼聯劫富屢佔先機|東方日報

今晚英足盃8強重頭戲，曼聯主場鬥富咸。「紅魔鬼」剛於歐霸盃殺入8強，朝住「小3冠」進發，球隊將帥都極度重視英足盃；富咸兩連敗士氣麻麻，作客奧脫福更加難踢，睇番近年交手曼聯往往佔得先機，半場主勝博得過。（myTVSuper周一凌晨零時30分直播）

曼聯今季盃賽表現出色，早前率先捧走英聯盃，加上佢哋聯賽爭標機會渺茫，餘下嘅英足盃同歐霸盃更加志在必得。「紅魔」喺英足盃高歌猛進外，日前歐霸盃16強「雙殺」貝迪斯亦躋身8強，為爭做「盃賽3冠王」戰意必堅。拉舒福特上仗入靚波後被收起，明顯留力今仗，雖然中場卡斯米路開始停賽，但曼聯近20場主場贏18場，氣勢旺盛，遇上富咸勢必速戰速決，以免夜長夢多。

富咸近況滑落
富咸聯賽遭遇兩連敗，上仗對榜首阿仙奴半場就落後3粒，近況明顯滑落，首席射手阿歷山大米祖域已經3個幾月冇波入，入球重責落喺新兵沙洛文身上，可惜呢位以色列國腳身形輸蝕，對住曼聯逼搶踢法難有作為。既然曼聯近5次對富咸，4次領先半場，今仗半場主勝值得再追。