曼聯半和愛得過|東方日報

兼顧歐霸勒住踢
今晚英超早場，曼聯主場迎戰愛華頓。「紅魔鬼」上仗小勝賓福特，聯賽連續3場失分後終於重響勝鼓，全力護級嘅「拖肥糖」近4仗不敗，今仗作客奧脫福定必加強防守，曼聯主場勝率雖高，但佢哋近期早段表現慢熱，近5仗主場4次開半場和，半場和值博。

（Now621及611周六晚7時30分直播）
英超前4戰況激烈，曼聯同兩大競爭對手紐卡素及熱刺纏鬥，上仗火併賓福特，憑拉舒福特重拾射門鞋，最終險勝1比0重返前4，今仗繼續主場乘勝追擊，不過中場卡斯米路仍要停賽，嚟緊下周中又要喺歐霸盃8強首回合主場火併西維爾，坦哈格要小心部署，好好分配兵力。

主場強勢但入局慢
曼聯主場威力十足，對上一次主場輸波已經係去年9月歐霸盃輸畀皇家蘇斯達，之後保持20勝3和強勁走勢，今仗贏面高，不過佢哋近期入局頗慢，近6仗5次開半場和，單計主場亦近5仗4次開半場和，半場和似乎係更佳選擇。

愛華頓夠體力穩守
另邊廂，英超下游護級大亂鬥戰火連天，愛華頓近4仗1勝3和，以27分排喺16位，僅以較佳得失球壓住同分嘅森林同般尼茅夫，就算奧脫福球場係龍潭虎穴都要諗辦法搶分，佢哋周中冇快車賽程，球員有較充沛體力應戰，定必加強防守，相信頂住半場唔難。