白禮頓火力猛平手盤好路|東方日報

另一場英超大戰，唔識入波嘅車路士，主場鬥着晒火嘅白禮頓。車路士連續4場冇波入，下周仲有歐聯8強次回合顧忌，主場都會踢得綁手綁腳，相反白禮頓踢法悅目開放，上場畀球證誤判失分，今場有力反客為主，平手盤絕對要撐白禮頓。

（Now621周六晚10時直播）
車路士雖然有名宿林柏特接手，但首仗對狼隊即吃悶棍輸0比1，之後歐聯8強首回合作客皇馬慘吞兩蛋，表現未見起色。進攻力欠奉問題，季初搞到依家都未搞掂，上場鬥皇馬「林伯」刻意轉陣，收起夏維斯，用史達寧同祖奧菲歷斯打雙箭頭，但仍未能打破0入波嘅尷尬局面。
車路士攻力差兼有歐聯後顧

其實林柏特喺輸畀狼隊之後，已經承認車仔問題嚴重，唔係一朝一夕可以改變到，叫球迷有定心理準備慢慢捱。依家擺在眼前嘅係，球隊要喺聯賽追上去攞歐洲賽入場券唔係唔得，但有一定難度，但下場歐聯主場對皇馬，又唔可以完全放棄，無論球隊上下，都有啲進退失據，肯定影響表現。

白禮頓上仗對熱刺兩遭誤判而輸1比2，非常唔抵，雖然球證之後道歉，但球隊要番啲分好過，呢1分甚至係3分，對現時排第7嘅「海鷗」真係好重要，球隊谷埋一肚火，最好搵狀態低迷嘅車仔洩憤。白禮頓一向攻得，各項賽事近8仗場場有波入，日本國腳三笘薰狀態大勇，有力反客為主。睇番足智彩個讓球盤，今場開平手盤，但「讓球主客和」就係白禮頓「-1」，證明都係睇客隊高啲，今場揀白禮頓無錯。