阿根廷U20大開殺戒_東方日報

3分在手放膽爭勝

Ｕ20世盃A組第2輪，阿根廷Ｕ20再度登場，迎戰危地馬拉Ｕ20。阿根廷Ｕ20首輪2比1反勝烏茲別克Ｕ20，有驚無險旗開得勝，手執3分爭出線冇壓力，可以更放膽搶攻爭勝，危地馬拉Ｕ20防守力薄弱，預計難以死守，建議捧中位數3.5球大。（周三凌晨5時開賽）

阿根廷大國腳去年贏得卡塔爾世盃冠軍，今次輪到阿根廷Ｕ20做主角，佢哋藉臨時獲得主辦權，參賽資格失而復得，一班小國腳都被寄予厚望，首仗對烏茲別克Ｕ20，一開賽就意外先失1球，但好快就穩住陣腳連入兩球，完半場前已經反先2比1，保持同樣比數至完場全取3分，有個好開始。


三線球員狀態俱佳

今仗繼續出擊，將毫無保留爭3分以確定出線位置，並藉對手實力較弱機會爭取鋒線進一步磨合，中鋒韋歷斯同10號仔國米小將華倫天卡邦尼上仗順利開齋，一對翼衞巴高同積耶交出助攻，呢班小將繼續爭取數胡機會。

危地馬拉Ｕ20以往甚少出席決賽周，仍需累積經驗，佢哋首輪對新西蘭Ｕ20，戰至80分鐘失守輸0比1，睇番該隊全場控球比率只得42%，今場對住實力更強嘅阿根廷Ｕ20，料難以死守，加上阿根廷Ｕ20近2次對中北美球隊全勝，料將上演入球騷。