白禮頓擸歐霸入場券_東方日報

安斯素轟入世界波逼和曼城
白禮頓如願挑戰歐洲列強，攞到來屆歐霸盃入場券！喺周四凌晨英超，「海鷗」憑19歲新星安斯素30碼外轟入世界波，主場以1比1逼和盟主曼城，終止對方聯賽11連勝走勢之餘，更鎖定史上最高第6名，換來出戰歐霸盃資格。白禮頓今季表現令球迷拍爛手掌，原來好成績背後有秘密，就係班主Tony Bloom擁有全球球員資料同球探系統，為「海鷗」源源不絕提供平價好球員。

作客嘅曼城強陣出擊，開賽25分鐘艾寧夏蘭特突破防線，交畀無人看管嘅菲爾科頓射入領先。不過需要1分即可鎖定歐霸盃入場券嘅白禮頓搶回主動，戰至38分鐘，巴拉圭19歲新星安斯素中場攞波後，推前兩步即離門30碼炮彈式轟入死角，坐喺龍門後面嘅曼城球迷都不禁為佢鼓掌，最終兩隊踢成1比1完場。

白禮頓創會121年來首度進軍歐洲賽，完場後主場亦奏起歐霸盃音樂，領隊迪薩比賽後表示：「面對曼城總係難踢，但我哋踢得好好，值得攞到呢1分，值得出戰歐霸盃。」至於安斯素轟入嘅世界波，被譽為今季英超全年金球熱門之一，前英格蘭國腳列納大讚：「呢球係C朗級數射門，我睇英超好耐冇見過咁精彩嘅入波，完全係頂尖嘅技術！」

數據公司助發掘潛質新星
安斯素今季只踢過6次正選，但已經入咗4球，證明白禮頓待爆新星多不勝數，呢個功勞就歸功於班主Tony Bloom，呢位博彩公司老闆旗下嘅數據公司Starlizard，有齊全球各地球員嘅詳細資料，精密分析確保唔會「買錯人」，奉行嘅「低買高賣」政策亦非常成功，近年高價賣走賓韋特、古古列拿、丹般恩、比蘇馬、李安度杜沙特等球星，但成績未受影響。至於三笘薰、摩西斯卡些度、阿歷斯麥亞里士打、艾雲費格遜、佩華斯艾斯杜比倫同最新上位嘅安斯素，好多都喺南美洲或二線聯賽平價吸納。

Tony Bloom向傳媒表示：「我哋下季可以應付各項賽事，就算有主力離隊都冇問題，足球就係咁樣，只要價錢合適就可以交易。」據報白禮頓已預計摩西斯卡些度同阿歷斯麥亞里士打將高價轉會，會方亦於1月由羅沙里奧中央簽入18歲中場保拿洛迪，以及瑞典19歲中場艾耶利，被睇好可以喺下季彈起。