愛華頓發茅贏波上岸_東方日報

護級機會最高嘅愛華頓，今晚煞科戰主場對般尼茅夫。「拖肥糖」今季持續低迷，戴治季中接手林柏特嘅爛攤子後，至今僅得4勝，幸運嘅係今晚3場生死戰當中，愛華頓呢場最易踢，已經護級成功嘅般尼茅夫睇嚟唔會攔路，而且形勢上「拖肥糖」贏波即上岸，加上主場氣勢，熱捧主勝。（Now621及611周日晚11時30分直播）

般茅無欲無求踢風流波

愛華頓只要全取3分，就毋須理會另外兩場賽果，得以保住英超席位，「拖肥糖」早前曾以5比1大勝白禮頓，上仗亦逼和狼隊1比1，狀態理想。今場生死戰肯定全民皆兵，迪馬雷格雷擔任箭頭，配合近況出色嘅杜韋麥尼爾同杜哥利搶攻，對狼隊補時9分鐘入波嘅中堅耶利文拿亦會隨時出擊，3分志在必得。

般尼茅夫自從4月底連勝修咸頓同列斯聯兩支護級對手後，一早脫離護級危險區域，近期球員表現明顯鬆懈，近3仗全敗，失6球僅入1球，當中輸畀車路士，更係林柏特接手「藍戰士」後唯一勝仗，反映般茅球員已經無欲無求，客隊如此狀態，更加有利於愛華頓贏波上岸，主勝看高一線。