歐國外：比利時托弗搶W冇難度_東方日報

歐國外F組焦點戰，比利時主場火併奧地利。「歐洲紅魔」新帥泰迪斯高帶領下撥亂反正，箭頭盧卡古更重拾射門鞋，加上主場出擊特醒，要贏奧地利冇難度，主勝有計。

（周日凌晨2時45分開賽）

堂堂2018年世盃季軍，比利時喺上年世盃竟然分組賽出局，令人大跌眼鏡，主帥馬天尼斯離職，隊長夏薩特退出國家隊，搵來新帥泰迪斯高重建球隊。呢位前史浩克04及RB萊比錫教頭只係略改陣式，棄用3人防線，改打4231陣式，中場重用活力十足嘅阿馬度奧拿拿，化被動為主動，泰帥首度領軍喺歐國外先大勝瑞典3比0，次仗熱身賽領先3粒下贏德國3比2，兩連勝開個靚頭，箭頭盧卡古喺呢兩仗入4粒，腳風轉順，就算隊長奇雲迪布尼因傷倦勤都冇有怕。

奧地利作客6戰4敗
另邊廂，奧地利由前曼聯及RB萊比錫教頭蘭歷克執教，近4仗贏晒，包括F組頭兩輪順利贏波，但要留意對手只係阿塞拜疆及愛沙尼亞，而4仗中有3仗來自主場，另一場喺中立場擊敗弱旅安道爾，單計作客近6仗4度落敗，不宜高估。以波論波，比利時梗係質勝一籌，依家喺泰帥接手後重拾信心，睇埋佢哋近5次主場出擊，取得4勝1負，今仗有力乘勝追擊。