艾爾：信莫迪歷別無他選_星島日報

克羅地亞喺歐國聯4強同荷蘭鬥得激烈，「格仔兵」最後喺加時勝出。雖然艾爾覺得歐國聯嘅重要性不大，但克羅地亞展示出嚟嘅幹勁真係值得佩服。

平心而論，對比法國、英格蘭等歐洲強隊，克羅地亞嘅陣容唔算起眼，除咗莫迪歷嘅技術比較強，其他球員嘅實力都好平均。不過，連埋上仗擊敗荷蘭，克羅地亞近4次大型比賽嘅加時賽，只係喺2020年歐國盃輸過畀西班牙，「加時之鬼」唔係浪得虛名。

可以踢到咁嘅水準，艾爾覺得隊長莫迪歷居功至偉。佢上場踢足120分鐘，仲搏到12碼，又有助攻同入波，名副其實嘅「全能隊長」。更加重要嘅係，球隊可以經常喺加時賽交出好成績，作為精神支柱嘅莫迪歷作用非常重要。做人最緊要有信念，莫迪歷帶畀「格仔兵」嘅信念，係球隊最大嘅原動力。嚟緊決賽大戰，西班牙相信會非常頭痕。

另一邊廂，日本踢緊乙組聯賽同聯賽盃分組賽。北海道札幌岡薩多今季聯賽盃主場曾經贏過橫濱水手3:2，火力保持強勁。今次聯賽盃對住乙組嘅磐田山葉，贏面幾大，但防守始終唔穩陣，推介全場入球大細3.5大。艾爾