Ｕ21歐國盃小組形勢分析_東方日報

A組：荷蘭超晒班葡軍火力猛
簡評：荷蘭U21有大國腳賴恩格雲貝治及堅尼夫泰萊領軍，配合約舒亞舒克斯、森馬維亞同達寧加等，實力超班，極大機會獲得首名出線。葡萄牙U21屬外圍賽火力最強球隊，就算有法比奧韋拉因傷退隊亦不容忽視。相比之下比利時U21及格魯吉亞U21實力平平無奇，格軍更有拿玻里翼鋒基華拉斯基利亞宣布唔參賽，就算有主場之利，恐怕都係陪跑居多。

B組：西班牙U21見慣大場面
簡評：西班牙U21多位球員有西甲經驗，並有可翼可閘嘅曼城小將沙治奧高美斯擔大旗，加上外圍賽連場報捷，係呢組首名不二之選。其餘3隊實力不相伯仲，車路士貴價快翼梅迪歷為提升狀態，自願從大國腳「降級」為烏克蘭U21出戰，增添出線籌碼；克羅地亞U21亦有部分名將之後助陣，反觀羅馬尼亞U21質素稍遜，希望憑整體戰殺出重圍，預料次名屬烏、克之爭。

C組：日耳曼殘陣英軍秤先啲
簡評：衞冕嘅德國U21雖有大國腳尤素法莫高高回歸，但多名主力因傷落選，想首名出線存有暗湧。「日耳曼」最大對手英格蘭U21人才輩出，就算前鋒巴洛根早前放棄代表「三獅兵團」，仲有伊美路維及高爾龐馬等優質小將壓陣，有望一洗近屆常喺分組賽出局頹風，首名之爭秤先啲。另兩隊捷克U21及以色列U21曾於外圍賽輸過畀英德，難有作為。

D組：各自有猛將法意爭崩頭
簡評：呢組法國U21及意大利U21同為出線熱門，意大利今屆強陣出擊，適齡球員大部分都可出戰，連大國腳辛度東拿利都被召回助陣，目標當然係冠軍；法國實力同樣強橫，名將杜林之子卡夫蘭杜林早已被歐洲豪門虎視眈眈，不容小覷。意大利U21近5屆有4次成功躋身淘汰賽，其中兩次以首名晉級，首名不離呢兩隊。瑞士U21及挪威U21質素所限，難做攔路虎。