華斯高6連敗讓唔起古亞巴_東方日報

聽朝有場巴甲獨腳戲，華斯高主場迎戰古亞巴，老牌球隊華斯高今季重返巴甲之後，表現力有不逮，最近更錄得聯賽6連敗，球員已經陷入信心危機，恐怕短期內無力反彈。古亞巴正好趁機搶分，爭取擺脫降班威脅，今仗仲有得受讓，讓球客勝可取。（周二早上8時開賽）

教練被炒內部混亂

華斯高擁有124年歷史，曾經栽培出羅馬里奧、艾蒙度等名將，但近年長期積弱，2021年更加搞到降班，雖然今季升番上巴甲，但明顯未夠班，踢11場聯賽僅1勝3和7負，成為降班熱門。
最離譜係近4次主場出擊都輸波，而且只入1球，幾乎任由對手宰割，結果華斯高上仗輸畀戈亞斯之後，教練巴比利被炒，球隊內部混亂不堪，預料會繼續沉淪。

至於古亞巴雖然同樣受降班威脅，但整體表現有改善，特別係防線比以往穩陣，近5仗僅1敗，包括近3場作客獲得2勝1和，水準靠得住。今仗遇上陷入低谷嘅華斯高，相信有力全身而退，讓球客勝可取。