自由盃：小保加細鍊莫納加斯_東方日報

踢自由盃以穩為先

南美自由盃F組最後一輪賽事，小保加主場迎戰莫納加斯，阿根廷勁旅小保加已提早獲得出線權，今仗和波都可以取得小組首名，爭勝戰意成疑，預料唔會急於搶攻。事實上，小保加出戰自由盃，踢法一向謹慎，近5場自由盃有4場總入球開2球或以下，一於再博2.5球入球細。

（周五早上6時開賽）
小保加踢5場分組賽取得3勝1和1負排榜首，但僅入5球，換言之平均1場入得1球，攻力比較疲弱，但失球數字亦非常少，只係失兩球，包括作客0比1不敵第2位佩雷拉。由於小保加今場和波都可以獲得小組首名，更加可以歎慢板，啱晒佢哋穩陣踢法。

莫軍作客腳仔軟

至於委內瑞拉球隊莫納加斯排第3位，落後佩雷拉2分，今場必須贏波，加上佩雷拉失分，先至有機會出線，形勢非常被動。由於同組另一場佩雷拉對高路高路同時間舉行，一旦比賽途中，佩雷拉領先，肯定影響莫納加斯爭勝決心。更何況莫納加斯本身實力有限，近6場自由盃作客全敗，恐怕想搶分都有心無力。值得一提，小保加同莫納加斯首循環交鋒打和0比0，不妨再追入球細。