艾爾：挪超雙雄鬥火力入球必多_星島日報

今日《猜波台》會直播評述橫濱水手對湘南比馬嘅日職賽事，艾爾喺度先推半場主勝。當然，有Gary、Will仔同小喬呢個樣貌同實力出眾嘅評述組合，相信會令呢場實力懸殊嘅球賽格外精釆，大家要多多捧場呀！

至於上季挪超冠軍莫迪，今輪會作客對今季暫時嘅榜首波杜基林特。莫迪近6季挪超非冠即亞，但今季球隊起步大脫腳。頭4場聯賽只有1和3負，之後轉打352陣式後，成績好番少少，目前以19分排聯賽榜第5位。

睇番莫迪開季作客6戰2勝4負，輸過畀聯賽榜下游嘅阿里辛特同奧特足球會，對住維京亦只能夠以4比3僅勝。對比同樣作客6戰有5勝1負嘅波杜基林特，莫迪作客失分咁多，絕對係爭冠嘅致命傷。

另外，自從上季上陣25場入15球嘅射手大衛科芬拿轉投車路士之後，莫迪嘅攻力無咁銳利。目前球隊嘅神射手拜恩希特臣近5場入5球，狀態都唔錯，但今季加盟嘅箭頭維頓貝利沙更加傷多過踢，進攻點唔係太多。

莫迪今季作客表現實在太飄忽，呢次作客波杜基林特會相當難踢。不過，兩邊今季場均入球數字都唔錯，艾爾推介全場入球大細3.5大。艾爾