艾爾：日本門將還待新星_星島日報

今個月「猜波台」睇咗兩個星期日職，相信大家都感受到娛樂性有幾強，尤其係龍門嘅表現，令到球賽絕無悶場！

艾爾相當尊敬嘅門將西川周作，估唔到可以喺對川崎前鋒嘅關鍵大戰上，展示用腳「彈琵琶」，喺自己龍門面前控甩波，結果被追和，浦和紅鑽可以話痛失2分。另外，川崎前鋒嘅上福元直人、湘南比馬嘅宋範根等門將，同樣有「炸彈級」嘅表現，實在睇到黑人問號。

唔止日職，唔少外流過嘅日本門將表現都麻麻哋。當中，上屆世界盃正選門將權田修一，喺對德國一戰上演過廿秒擋四球嘅精采畫面，但日本第一個失波，正係佢喺禁區內嘅鹵莽攔截，令對手憑12碼領先。另一位老大哥門將川島永嗣，喺法甲打滾多年，表現亦唔算太搶眼。

喺度唔係雞蛋裏挑骨頭，只係眼見日本近年嚟咁多球員外流後脫胎換骨，唯獨門將呢個位置上，艾爾覺得都係弱啲，無論係飯倉大樹、前川黛也等較為年輕嘅日職門將，都接唔到棒，一眾老將又高峰已過。

如果日本想喺世界盃上攀上更高位置，艾爾覺得除咗9號位之外，門將嘅新舊交替係嚟緊非常重要嘅任務。艾爾