墨超：聯賽兩連勝食住上 瓜達拉哈拉碌卡捧Ｗ_東方日報

聽朝墨超首循環尾場賽事，榜首瓜達拉哈拉主場硬撼尼卡沙。老牌球會瓜達拉哈拉開咧兩連勝，新星約拿芬柏迪拿表現Sharp醒，加上近年交手食住尼卡沙，今場可望藉地利再下一城，主勝有計。（周五早上11時開賽）

瓜達拉哈拉於上季墨超次季後賽殺入決賽，可惜輸畀堤格雷斯，屈居亞軍。今季佢哋捲土重來，頭兩輪接連擊敗利昂同聖路易斯體育會，合共攻入5球，暫居榜首。其中17歲新星約拿芬柏迪拿表現突出，連續兩仗都有士哥，成為瓜達拉哈拉動力泉源，上仗贏聖路易斯體育會3比1之役，左閘基斯甸卡達朗亦交出兩個助攻，火力全開之下，今場勝算較高。

尼卡沙把握力麻麻
另邊廂，尼卡沙於上季墨超次循環淪為尾二，連季後賽都入唔到，今季開咧後頭兩輪都和波收場，包括上仗對住迪祖亞拿，全場壓住嚟攻但係不斷失機，結果被對手偷襲得手先開紀錄，若非末段阿倫蒙迪斯建功，連1分都保唔住，臨門一腳認真麻麻。翻查紀錄，雙方近4次交手，瓜達拉哈拉全部贏晒，擺明格食格，1.7倍主勝捧得過。