熱身賽：中場試陣踢得更放 利物浦大鬥卡爾斯魯厄_東方日報

正拉隊到德國集訓嘅利物浦，將進行首場熱身賽，對手係德乙卡爾斯魯厄。「紅軍」今夏換血集中喺中場，阿歷斯麥亞里士打同蘇保斯拉爾兩名新兵亮相，務求盡快融入球隊踢法體系，卡爾斯魯厄早於6月底開操，近5場熱身賽全開3球或以上，預計今場大把波入。（周四凌晨零時30分開賽）

利物浦今夏有多人離隊，主力球員計有羅拔圖法明奴、拿比基達、占士米拿同阿歷士張伯倫等，至於隊長佐敦軒達臣同法賓奴，近日收到來自沙特斟介，離隊機會頗高，今仗暫不會上陣，主帥高普將利用今仗測試新陣。

「紅軍」重金簽入阿歷斯麥亞里士打同蘇保斯拉爾，兩人合共耗費過億鎊，阿歷斯麥亞里士打係去年卡塔爾世盃阿根廷奪冠功臣之一，近季喺白禮頓有出色表現，質素有保證，蘇保斯拉爾更係匈牙利隊長，甫加盟即獲分配傳奇8號球衣，兩位新兵今仗聯袂上陣，令人期待。

卡軍提早開操谷起狀態
卡爾斯魯厄係德乙中游球隊，今季早早開操，已經踢咗5場熱身賽，有贏有輸，全開3球或以上，當中有場狂數對手18比0，對住勁旅利物浦相信唔會縮，繼續放膽進攻，加上「紅軍」剛開操狀態初起，後防冇咁硬淨，預計今場互有攻守，入球唔會少。