友誼賽：紐卡素大盤有數維_東方日報

喺美國舉行嘅英超季前賽，上季殺入前4嘅紐卡素，將會面對阿士東維拉。兩軍上季於英超都大躍進，不單止紐卡素成功進軍歐聯，阿士東維拉亦取得歐協聯入場券，由於雙方都已經開始咗熱身賽，今場一開波就可以嚟料，兩軍上季聯賽兩循環都大手交易，相信呢場都唔會留手，開定電視等睇入球騷。（Now621周一早上7時直播）

今場喜鵲鬥維拉會喺費城舉行，無獨有偶，嚟緊新一季英超開鑼，兩軍首戰就係對住對方，今場可以一探對方虛實。雙方已經展開咗熱身賽，紐卡素分別以3比2擊敗非聯賽球隊蓋茨黑德同2比1擊敗格拉斯哥流浪，新加盟嘅辛度東拿利已經上陣，「喜鵲」經過兩場熱身，今場可以一開波就攻。
維拉中場增兵添實力

另邊廂，維拉首場熱身賽鬥華素爾踢成1比1，佢哋今夏陣容加入泰利文斯同柏奧托利斯，後者係領隊艾美利喺執教維拉利爾時嘅愛將，兩人合作曾經奪得2021年歐霸冠軍，兩名球員嘅加入增添維拉中場線嘅深度。今場正式鬥英超球隊，可以見真章，事實上，維拉上季兩循環對碰各贏一場，紐卡素首循環贈維拉4蛋，維拉返主場復仇贏3比0，加上今場係表演賽性質，預計會有大量入球。