女世盃：近6仗鬥挪威贏5次 日本弗到爆再搶W_東方日報

女子世盃16強開打，今日下午同聽朝共踢3場，一次過同大家研究。兩支前冠軍日本女足同挪威女足，出線淘汰賽後即刻相遇，「大和撫子」分組賽3連勝，而且近6次鬥挪威女足贏咗5次，今場有望再下一城，殺入8強，推介主勝。

（Now630周六下午4時直播）
挪威曾奪得1995年冠軍，分組賽首兩戰只得1和1負，最後一仗面對首次打入決賽周嘅菲律賓，先至打開勝利之門。相反，2011年盟主日本女足攻守俱備，以細膩腳法及速度撕破對手防線，3戰全勝入11球0失球，尤其大勝西班牙女足一役更盡顯霸氣，射入4球嘅宮澤日向將繼續成為攻擊主力，「大和撫子」近4仗全勝，主勝熱得有道理。

瑞士冇料到鬥牛獻細
至於今日早場，有西班牙女足硬撼瑞士女足。西班牙女足最後一場分組賽，喺大部分主力在陣下，竟然大敗0比4畀日本女足，雖然無損出線，但卻被淋一盤冷水，今場肯定唔會再大意。瑞士女足雖然奪得A組首名出線，但攻擊力欠奉，3場分組賽僅入得兩球，球隊近4場全開2球或以下，相信今仗仍會以鐵血防守對抗西班牙，2.5球入球細好路。
（Now630周六下午1時直播）

荷蘭勢勇速擒南非
唔好漏咗，周日朝早仲有場荷蘭女足對南非女足。上屆亞軍荷蘭愈踢愈順，無論身型、踢法及戰術，均比南非唔止勝一籌，加上南非後防一般，3戰共失5球，半場都頂唔住「風車國女足」狂攻，半場主勝咪嫌熱。
（Now630周日早上10時直播）