英超：愈賣愈熱賓福特平手盤拔刺_東方日報

今日英超首輪上演「倫敦打吡」，由賓福特主場鬥熱刺。賓福特近年被稱為「巨人殺手」，面對強敵往往有超水準演出，遇上剛剛將哈利卡尼賣走嘅熱刺，賓福特愈賣愈熱，讓球主客和由原本受讓變讓波，擺明有計，讓球盤開平手必撐賓福特。（Now 621周日晚9時直播）

「蜜蜂仔」上季主場對Big 6僅1敗
「蜜蜂仔」賓福特上季聯賽排第9，遇強愈強就係佢哋最大特色，上季主場迎戰傳統「Big 6」球隊，只輸過一場。雖然王牌前鋒艾雲東尼因違規賭波正被停賽，但賓福特嘅整體戰頗為成熟，穩守突擊踢法專剋豪門，近3次對熱刺錄1勝2和未輸過。

作客嘅熱刺新季變動頗大，新帥普斯迪高路上任後豪言會踢進攻足球，一眾球員都要時間適應新踢法，最慘係哈利卡尼已經轉投拜仁慕尼黑，熱刺缺少呢位王牌，想入波更難。

值得一提係今仗盤口變動，讓球主客和由初盤熱刺「-1」，截稿前轉為賓福特「-1」，主客和主Ｗ由2.53倍跌到落2.43倍，愈賣愈熱。再睇埋讓球盤，雖然都係開緊平手盤，賓福特由1.93倍跌到1.88倍，熱刺則由1.83倍升到1.88倍，似乎各方都較為睇好「蜜蜂仔」，平手盤一於撐佢哋。