阿聯盃：聖羅倫素平手盤揀得過_東方日報

近年交手贏多輸少

聽朝阿甲盃B組賽事，聖達菲聯主場硬撼聖羅倫素。聖達菲聯雖然近況尚可，但和波偏多，而且兩軍交手聖羅倫素稍佔上風，平手盤一於撐聖羅倫素。（myTVSUPER周二早上7時直播）

聖達菲聯攻力不足

雙方喺阿甲盃B組打咗兩仗，同樣取得1勝1和，狀態不相伯仲。聖達菲聯近期演出穩定，連埋之前阿甲在內，近7仗保持不敗，不過要留意，當中有5仗係和波，確係和波偏多，而且有4仗係食白果，可見佢哋打法穩陣有餘，卻欠缺贏波把握。

另一邊廂，聖羅倫素早前要兼顧南球盃，難怪影響穩定性，隨住上月喺南球盃畀聖保羅踢出局，依家可以專心國內賽事，除咗喺阿甲盃B組獲1勝1和外，上周中於阿根廷盃亦淘汰貝格拉諾，表現回穩，射手阿當巴里路近3仗入3粒，腳風轉順。睇番早前阿甲，聖羅倫素最終位居第3位，遠遠甩開下游嘅聖達菲聯幾條街。

翻查紀錄，雙方近10次正面交鋒，聖羅倫素取得5勝4和僅1敗，其中有6次係先開紀錄，完全唔驚聖達菲聯，今仗開出平手盤咁筍，聖羅倫素就算作客亦可看高一線。