世南美：烏拉圭格食格誓響頭炮_東方日報

聽朝頭場世盃外南美區首輪大戰，由烏拉圭主場火併智利。烏拉圭有「瘋子教頭」比爾沙接手，首要目標係重建球隊再闖世盃，遇上佢熟到爛嘅智利，有力打響頭炮，主勝有計。

（HOYTV76台周六早上7時直播）
烏拉圭喺上年世盃仍倚重一眾老將，表現暮氣沉沉，最終於分組賽出局，於是找來老帥比爾沙執教，隨着一眾老將蘇亞雷斯、卡雲尼等淡出，比帥銳意重建球隊，改由費達歷高華維迪、達雲紐尼斯等擔大旗，並喺之前兩仗國際賽領軍，先後擊敗尼加拉瓜及古巴，重現活力。比爾沙執教生涯遊歷南美同歐洲，單係國家隊就教過阿根廷、智利同烏拉圭，經驗相當豐富，而佢標誌式逼搶打法，對哥迪奧拿、施蒙尼、普捷天奴等名帥影響深遠，堪稱一代宗師。

智利靠老將孭飛實力曳
相反，智利陷入青黃不接，雖然召入多名年輕球員，但質素未見突出，而且仍要倚重加利美度、維達爾及阿歷斯山齊士等已走下坡嘅老將，恰巧佢哋都係比爾沙喺2007至2011年執掌智利時所發掘嘅主力，老帥對佢哋瞭如指掌。雙方近4次正面交鋒，烏拉圭取得3勝1和，擺明格食格，今仗可藉地利在世盃外打開勝利之門。