亞冠：撐空軍體育會下盤_東方日報

伊蒂哈德狀態曳

亞冠盃C組賽事，由沙特阿拉伯豪門伊蒂哈德，主場迎戰伊拉克球隊空軍體育會。以沙特冠軍身份出戰嘅伊蒂哈德，係今屆賽事冠軍熱門，不過近期狀態差勁，對住踢法硬淨嘅空軍體育會唔易食，讓球盤要讓2球／2球半太辣，下盤值得捧場。（HOYTV76台周二凌晨零時直播）

伊蒂哈德喺小組首輪3比0大勝AGMK足球會，不過上輪作客沙巴罕因安全問題取消，需要擇日重賽。

保守戰術限制賓施馬發揮
令人擔心嘅係伊蒂哈德愈踢愈沉，近4場比賽法定時間得3和1負未贏過，葡萄牙籍教練紐奴嘅保守戰術，未能發揮賓施馬等星級前鋒嘅威力，霸氣欠奉。

另邊廂，作客嘅空軍體育會頭兩輪1勝1和暫排榜首，雖然佢哋實力唔算一線，不過踢法硬淨甚少大敗，過去24場亞冠盃賽事，只係有1場波輸多過1球，對上4場亞冠盃更有2勝1和1負成績，今仗對住狀態麻麻嘅伊蒂哈德，相信戰況會頗為緊湊，開下盤機會高。